Hörümçək adam olsan neynərdin?

9 yaşlı (4-cü sinif) şagirdi Selinin yazdığı, dolayısı ilə müəllimin yazdırdığı inşanı sizlərlə paylaşmaq istəyirəm. Qeyd edim ki, inşa şagirdin öz fikrini əks etdirir, yəni özü, valideyn müdaxiləsi olmadan yazıb.

İnşanın adı "Mən Hörümçək adam olsaydım  nə edərdim?"dir 🙂.

İnşanın müəllimin şəxsi təşəbbüsü olduğunu, yoxsa tematik plana görə yazdırdığını bilmirəm. Amma anlaya bilmirəm ki, belə bəsit, təxəyyülü inkişaf etdirməyən, şagirdləri müəyyən çərçivəyə (şablon) salan və eyni cür düşünməyə məcbur edən belə tapşırıqların əsas məqsədi nədir?

Tutaq ki, Hörümçək adam mətninin tədrisindən sonra hansısa tapşırığın verilməsi zəruridir. Mən bildiyim qədərilə, inşa, esse hər hansı əsərin, situasiyanın ideyasına verilən münasibətdir. Tutaq ki, Azərbaycanın ideal və problemlərsiz ölkə olduğunu düşünməyə məcburuq, ola bilməzdimi ki, heç olmasa dünyada baş verən qlobal problemlər və onların aradan qaldırılması üçün şagirdərin sadəcə fikrini soruşan bir inşa verilsin onlara?

Müəllif : Ilaha Fazilova
#ilahəfazilova

Deməli  4 cü  sinifdə dərs  deyən  bir  ibtidai  sinif  müəlliminə  mentorluq  edirdim.  Mövzu  Yadplanetlilər  mövzusu  idi. Müəllim  çox  cansıxıcı  və  ənənəvi  bir  qaydada  dərs qurmuşdu. Hansı  ki,  o mövzu dövlətin  tələbi  olan  "Mətnə  əlavələr  etməklə  mətni  dəyişdirir və  mətnin  yaradıcı  planını  tərtib  edir " standartının  yerinə  yetirilməsi  üçün  dərsliyə  daxil  edilmiş  mövzudur.  Müəllimə  iradımı  bildirəndə  müəllim  qayıtdı  ki,  belə  də  mənasız  mövzu  olar?  Bu  nədi  dərsliyə  salıblar  axı?  Uşağı  niyə  yadplanetlinin  varlığına  inandırmalıyıq  ki  biz?  Mən  niyə  uşağa  zorla  inandırmalıyam  ki  yad  planetli  var?  Suallarını  verəndə  mən  başa  düşdüm  ki,  müəllim  özü  hələ  hansı  mövzunu  nə  üçün  tədris  etdiyini  anlamayıb.  Şagirdə  nə  verəcək  bu  müəllim?
Hansı  ki  o mövzunun  içərisi  o qədər  zəngindir  ki,  şagird  o mətn  üzərində  işləməklə, əlavələr  və  dəyişikliklər  etməklə, personajların  mənfi  əməllərini  müsbətə  dəyişdirməklə hətta  bir  yad  planetli  olsa  belə  mərhəmətli  personajlar  yaratmaqla  nəinki  yeni  bir  "əsər,  rejissor  işi " yarada  bilər  eləcə  də  o  mətnə  maraqlı  plan  tərtib  edə  bilərdi.  Hansı  ki  müəllimlər  bu  tipli  mətnləri  ya ənənəvi  keçir,  ya da  "Yadplanetli  olsam  və  ya yadplanetli  görsəm  nə  edərdim " kimi  mənasız  tapşırıq  verirlər.  Bu  tip  yaradıcı  təfəkkürü,  xəyalı  inkişaf  etdirən  tapşırıq verməyin  deyən  yoxdur  əziz  müəllimlər,  amma  baxın  hansı  mövzuda  vermək  olar.
Uşağın  yazdığına   inanmayanlar  isə  deyim  bilin, bundan  daha  gözəl  ideyalar  irəli  sürən  şagirdlər  görmüşəm.  İnanın  və  güvənin  övladlarımıza. Yetər  ki  onların  potensialını  ortaya  çıxara  biləcək  tapşırıq  hazırlamaq  gücündə  olaq.
Hörmətlə,
Leyla Bayramova
#leylabayramova